No har eg juksa litt

eg sit her, og har eigentleg ikkje lyst til å skrive... men så kom eg liksom til å trykke på "ny post" (eller kva det no heiter) --- og då vart det berre sånn! Eller, litt lyst har eg då. Det er av di at eg har sletta ei bok frå "bøker eg skal lese" og satt ho over på "bøker eg har lest"-lista. Eigentleg er det prematurt, for planen er å lese ho ferdig NO! Når eg går og legg meg. Trur eg manglar omlag 80sider, men det er gjort på ein-to-tre når plottet tjuknar til på slutten av ei bok. Og i morgon har eg fri, så eg treng ikkje tenke på at eg burde legge meg å sove, eg kan berre nyte det å ligge i senga og lese.

Boka eg har flytta på er Kafka on the Shore. Eg har nemnd ho ein gong før. I ein heilt plausibel japansk røyndom (i alle høve slik ein trur at ein japansk røyndom no er, når ein faktisk ikkje har spesielt god innsikt i japansk daglegliv frå anna enn tv..) skjer alle desse fantastiske tinga. Eg er spent på slutten. Kjem det meir fisk dalande frå himmelen? Og kjem Nakata til å verte normal til sist? Finn Kafka mor og syster, som han alltid har lengta etter? No skal eg finne det ut.

Forøvrig synest eg at omslaget på boka er fint. Ikkje noko maleriske greier med gut på strand eller noko. Neida, svart katt.